2023-nji ýylyň 9-njy dekabrynda bosagamyzda duran we dünýäde ykrar edilen Gahryman Arkadagymyzyň taryhy başlangyjy bilen Birleşen Milletler Guramasynyň ýörite Kararnamasy esasynda dünýä döwletlerinde giňden we dabaraly bellenilýän “Halkara Bitaraplyk güni” mynasybetli Myrat Garryýew adyndaky Türkmenistanyň Döwlet lukmançylyk uniwersitetiniň binýadynda döredilen “Dermanlyk ösümliklerimiz – saglygymyz, mirasymyz” atly ÝUNESKO Klubynyň açylyş dabarasy boldy.
Klubyň açylyş dabarasyna Birleşen Milletler Guramasynyň Bilim, ylym we medeniýet boýunça guramasynyň (YUNESСO) işleri barada Türkmenistanyň Milli toparynyň jogapkär sekretary, Türkmenistanyň Gahrymany Çynar Täjiýewna Rüstemowa, köp sanly myhmanlar we Lukmançylyk uniwersitetiniň professor-mugallymlary, talyplary gatnaşdylar.
“Dermanlyk ösümliklerimiz – saglygymyz, mirasymyz” atly ÝUNESKO Klubynyň açylyş dabarasy mynasybetli bu ýokary okuw mekdebiniň eýwanynda türkmen halkynyň Milli Lideri, Gahryman Arkadagymyzyň kitaplarynyň, ýurdumyzyň baý dermanlyk ösümlikleriniň we halkymyzyň amaly-haşam sungatynyň sergisi gurnaldy.
ÝUNESKO Klubynyň açylyşy dabaraly ýagdaýda bolup, klubyň agzalarynyň ilkinji mejlisi geçirildi. Soňra açylyş dabarasy maslahat bilen dowam etdi.
Maslahatda çykyş edenler täze taryhy eýýamda Gahryman Arkadagymyz we Hormatly Prezidentimiz tarapyndan milli medeni mirasymyzy, ýurdumyzyň ynsan saglygyna şypa berýän baý dermanlyk ösümliklerini öwrenmeklige döredilýän mümkinçilikler, şertler, bu ugurda sagdyn, ruhubelent ýaş nesli kemala getirmegiň orny, uniwersitetde açylan “Dermanlyk ösümliklerimiz – saglygymyz, mirasymyz” atly ÝUNESKO Klubynyň taryhy ähmiýeti dogrusynda belläp geçdiler.
“Dermanlyk ösümliklerimiz – saglygymyz, mirasymyz” atly ÝUNESKO Klubynyň açylyş dabarasyna we maslahata gatnaşyjylar halkymyzyň we tutuş adamzadyň maddy hem-de medeni mirasyny öwrenmäge döredip berýän giň mümkinçilikleri we ýokary okuw mekdebindäki “Dermanlyk ösümliklerimiz – saglygymyz, mirasymyz” atly ÝUNESKO Kluby üçin türkmen halkynyň Milli Lideri Gahryman Arkadagymyza we Hormatly Prezidentimiz Arkadagly Gahryman Serdarymyza alkyş we hoşallyk sözlerini beýan etdiler.
